आमरो गाव का दुय अभिनयसम्राट
□*आमरो गाव का दुय अभिनयसम्राट!*□
~~~~~~~~~~~~~~~~~~~~
सच्ची बात सांगसू भाऊ, मोला एक्टींग को बारामा काहीच समजत नही रहे, असो लगं से मोला. अज 14 अगस्त से भाऊ, पापीस्तान को जलमदिवस, मी अज बिलकुलबी झुट नही बोलू.
मी मोरो लहानपनापासना दिलीपकुमार का बोहुत सारा सिलिमा देखी सेव. लीडर,कोहिनूर, मुगले आझम, राम और श्याम, गोपी, केत्त्तातरी. पर मोला कोनतोच सिलिमा मा वनं सिलिमा को पात्र ढुंडेवपरभी नही मिलेव. मला वोनं सप्पाई सिलिमा मा सिरफ दिलीपकुमारच भेटेव. आखिर मा मी हर सिलिमा मा सिरफ दिलीपकुमारलाच देखदेखस्यार परेस्यान भय गयेव होतो.
तसोच भाऊ मोला शाहरूख खान को हरेक सिलिमा मा सिरफ शाहरूख खानच भेटत गयेव. कोनतोच पात्र रवन देव, भेटसे सिरफ शाहरूख खानच. सब पात्रईनकी एक्टींग मोला समानच् दिसू पड़ से. वोनं सप्पा जवान टुरूपोटूईनला बिगळाय टाकीस भाऊ! सब आता वोकीच् नक्कल करन् लग्या.
असो येनं दुयी जन ला तथाकथित अभिनयसम्राट मुहून प्रसिद्ध करनो मा आयी से. पर मोला उनको हर सिलिमा मा घुमफिरस्यानी एकच एक प्रकारकी एक्टींग देख देखस्यानी मी परेस्यान भय् गयी सेव्. मंज्या मोला एक्टींग को बारा मा काहीच् समजत नही रहे, असोच् कव्हनो पड़े.
आमरो गावमा पयले एक दंढ्यार होती. वोकोमा झुम्मक शेंडे राधा/नाच्या को काम करंत रवं. दुसरो कोनतोच् गावमा आमरो गाव की दंढ्यार जाय का नही भाऊ, तं आमला जरा जागतच् सतर्क रवनो पड़त होतो. काहे का, झुम्मकला वोनं गावका लोग का नही, सही मा टुरीच समजत होता. असो आमरो झुम्मक, आपलो हरेक भिन्नभिन्न पात्रको चरित्र मा डूब जात होतो, अना हरबार ऊ नवोनवोच् दिसत् रवं. आता येव झुम्मक ह.भ.प.भयेव ना किरतन करंसे, गावगावमा जायस्यार.
तसोच भाऊ, आमरो गावको दंढ्यारको जोकर, यादोराव पुंगळे. वनं हसाई नई रयेस असो एक बी मानूस आमरो इलाकोमा नही भेटन् को! अना हरबार वोको पेंद्या अलगच ढंग को रवत होतो. रिपीटेशन नोहोतो भाऊ करंत वू. हरबार नवोच पात्र जगत होतो वू यादो! अज बिचारो ऊ यादो नही रहेव्, पर वोको पेंद्या जिननं जिननं देखी सेन् वय् वोला बिसर नही सकत्.
तं असा आमरो गावका दुय खराखुरा अभिनयसम्राट! दिलीपकुमार ना शाहरूख खान वानी हमेस्या एकच एक रिपीटेशन वालो रोल नही करीन उननं. हर रोल मा वय् अलगच् व्यक्ती दिसत्. उनकामो झुम्मक अना यादोला वय बिलकुल बदल टाकत आपलो नियत रोल मा. असा वय् आमरो गावका दुय अभिनयसम्राट!
पर का करेत भाऊ, उनका कोनी भक्तच नाहात ना! अना रहेत् बी मोरोवानी काही बारीकसारीक, तं उनकी कोन आयकसे? नही का?
@खिलीराम भाऊ
बोरकन्हार, जि.गोंदिया.
(14.08.2017)
~~~~~~~~~~~~~~~~~~~~~~~~~~~~
Comments
Post a Comment