झापड, घोडा आणि घोडागाडी : एक आठवण
◇◇"झापड", घोडागाडी आणि एक आठवण!◇◇ ~~~~~~~~~~~~~~~~~~~~~~~~~~~ ◇◇माझे वडील दि.25 जानेवारी 2018 ला वयाच्या 88व्या वर्षी वयोमानाने थकून निसर्गसामील झाले. ते हाडाचे शेतकरी होते. गायी, म्हशी, बैलजोड्या, हेल्यांच्या जोड्या, बक-या, मेंढ्या, बदका(तिन्ही प्रकारच्या), कोंबड्या, पांढरे ससे, पांढरे उंदीर, कुत्रे, इत्यादींचा आमच्या बालपणी आमच्या घरी अक्षरशः खंडीने जमघटच असायचा. माझ्या वडिलांनी जीवनात कधीही सायकल, बाईक, चारचाकी चालवली नाही, त्यांना ही वाहने हाकताही येत नव्हती तथा क्षमता असूनही त्यांनी ते घेण्याचा वा शिकण्याचा कधी प्रयत्नही केला नाही. त्यांचे आवागमनाचे एकमेव खात्रीचे साधन म्हणजे घोडागाडी!!! 40-50 किमी पर्यंत घोडागाडीनेच जाऊन त्याच दिवशी रात्रीपर्यंत घरी परतणे, हा माझ्या वडीलांच्या हातचा मळच जणू! ते जीवनात कधीही रात्रीला घराबाहेर थांबल्याचे मला आठवत नाही. कितीही उशीर झाला तरी रात्री-बेरात्री सुद्धा ते घरी परतायचेच. त्यांनी वयाच्या 80-82व्या वर्षापर्यंत घोडे पाळणे थांबवले नव्हते, जरी घोडागाडी कालबाह्य ठरली होती तरी. त्यांनी दोन जोड्या घोडे...