पोवारी बोली/भाषा को पुनरुत्थान.

पोवारी बोली/भाषा को पुनरुत्थान. 

~~~~~~~~~~~~~~~~~~~

       साल 2014-15 को दरम्यान मी एक पोवारी बोली/भाषा की पोस्ट फेसबुक परा टाकेव होतो. वोको पह्यले मी फेसबुक परा पोवारी पोस्ट बाचेव वा देखेवच् नोहोतो. मोरो फेसबुक-मित्र परिवार मा करीब साडेतीन हजार मित्र सेती, अना मी करीब एक सौ व्हाॅट्सॲप ग्रूप मा सेव. पर कही भी मोरो साल 2014-15 को पोस्ट को पह्यले मी पोवारी पोस्ट ना देखेव होतो ना बाचेव ना आयकेव होतो.

       

         मंज्या 2014-15 को दरम्यान मी फेसबुक परा पोवारी बोली की पोस्ट टाकेव् त् पोवारी बोली/भाषा को पुनरुत्थान करनेवालो पह्यलो व्यक्ती  मीच् आव्, असो मी कव्हन् लगेव त् वू सोळा आणा गलत होये, मी आता रावण को अनुयायी होन् लगेव् असो वोको सीधो अर्थ होये. अना असो बेमतलबको अनुमान ला, मी आपली पाठ आपुनच् थपथपायस्यानी, सच कर रही सेव् असोच् वोको अर्थ समजे पाह्यजे, असो मोरो बिचार से.

     पोवारी बोली/भाषा को पुनरुत्थान साठी आमरो पोवार समाज को बोहुत महानुभावईन्न बोहूत पह्यले पासून महत्त्वपूर्ण काम करी सेन्. जयपालसिंह पटले, मनराज पटले, ज्ञानेश्वर टेंभरे,..... असा काही मोठमोठा नाव त् आमरो सामनेच् सेती. मध्यप्रदेश अना महाराष्ट्र मा भी अन्य बोहूत मान्यवर होता अना अज भी सेती, जिन् न् पोवारी बोली भाषा को पुनरुत्थान मा आपलो अमुल्य योगदान देई सेन अना अज भी देय् रह्या सेती.

     आता आम्ही वोन् महानुभावईन्नको काम ला आगे बढाय रह्या सेजन्. नवो-पुरानो पिढी मा मोरो संगच् देवेंद्र चौधरी, मोतीलाल चौधरी, पृथ्वीराज रहांगडाले, मुन्नाभाऊ रहांगडाले, चिरंजीव बिसेन, सोनू भगत, नरेशकुमार गौतम, ऋषी बिसेन, वाय.सी.चौधरी, हिरदीलालजी ठाकरे, रणदीप बिसने, पालिकचंद बिसने, देवेंद्र रहांगडाले, आशिष अंबुले, वर्षा पटले रहांगडाले, शारदा चौधरी, छाया पारधी, विद्या बिसेन, छगनलालजी रहांगडाले, सी.एच.पटले, रविंद्र टेंभरे, अमिता टेंभरे, महेन्द्र रहांगडाले, डी.पी.रहांगडाले, कु.रक्षा ठाकरे, कु.कल्याणी पटले, कु.सलोनी चौधरी, वंदना कटरे, टेकरामजी बघेले, मुनेश रहांगडाले, सौ.उषाबाई पटले, ओमेश्वर रहांगडाले, कु.काजल राणे, पुनारामजी गौतम, रेखा कटरे, शेषराव येळेकर, मुकुंद रहांगडाले, नानीकरामजी टेंभरे, सौ.श्रुती टेंभरे बघेले, फनेन्द्र चौधरी,   ....... आदि सरीखा चमकता हिरा पोवारी को पुनरुत्थान साठी झट् रह्या सेती. देवेंद्र चौधरी न् त् एक इतिहासच कायम करी सेस्. अखिल भारतीय मराठी साहित्य संमेलन को सौ सालको इतिहास मा पह्यलोच् टाईम यवतमाळ को अना उस्मानाबाद को भी, असा लगातार दुय कविसंमेलन मा देवेंद्र चौधरी न् पोवारी मा कविता बाचीस् . या एक ऐतिहासिक घटनाच् भई से. 

     आमरो पोवारी बोली भाषा को पुनरुत्थान साठी सामूहिक प्रयत्न जोरसोर लका सुरू सेती. पोवारी/पवारी बोली साहित्य-कला-संस्कृती मंडळ की स्थापना अना रजिस्ट्रेशन करस्यानी आता येन् महत्त्वपूर्ण कामला गती आय रही से. पह्यलो अखिल भारतीय पोवारी बोली साहित्य संमेलन फरवरी 2019 मा शानदार तरीकालका मनायेव् गयेव्. दुसरो संमेलन कोरोनाको कारनलका स्थगित भयेव् अना आता दिसंबर 2021मा दुसरो संमेलन भंडारा जिला को तुमसर मा नियोजित होतो, पर काही अपरिहार्य कारणलका वाहाको संमेलन नागपूर मा दिसंबर 2021मा लेनो मा आयेव. सितम्बर 2021 आखिरवरी पोवारी बोली की लगभग 25-30 पुस्तक अना पत्रिका प्रकाशित भयी सेती. येन् पोवारी बोली को प्रगती को डंका आता गुगल अना ॲमेझानपरा भी बजन् लगेव्. येव् सब सबन् मिलकर काम करीन येको सुपरिणामच आय्.

       असो वर्तमान स्थिती को मद्देनजर अना असो आनिबानीको वक्त मा राजकारणी लोगईन वानी ओछोपना देखायस्यार कोनी एकटो येको श्रेय लेनो ठीक नही रव्हन को, असो मोला लग् से. 

    जय पोवारी, 

    जय पोवार, 

    जय राजाभोज!

¤

@ॲड.लखनसिंह कटरे,

बोरकन्हार-441902, जि.गोंदिया (30.09.2019/2020/2021)

~~~~~~~~~~~~~~~~~~~~~~~~~~~~